DRAMA/DRAMA SWARA/GENDING KARESMEN

Naskah cerita yang disusun oleh Wahyu Wibisana seperti Si Kabayan, Si Kabayan jeung Raja Jimbul, Aki Nini Balangantrang, dsbnya. Susunanan R.A.F seperti Pangeran Jayakarta, Perang, Ruhak Pajajaran, dsbnya, serta para pengarang lain baik berbentuk drama, drama swara ataupun gending karesmen, termasuk pula Gondang
Lengkapnya klik disini

GEUS SURUP BULAN PURNAMA

Prolog

Saban waktos, lisan urang tan kendat ngedalkeun solawat

Ka jungjunan urang sadaya, Nabi Muhammad SAW

 Allohumma sholli’ala Muhammadin ‘abdika,

wanabiyyika, warrosullika nabiyyil ummiyyi,

wa ‘alla alihi washobihi wassallam

Rupining hadis anu mertelakeun kamulyaan

kalih kaagungan Rosul, parantos sering pisan ku urang kadangu

Sajumlah riwayat anu nerangkeun kajadian demi kajadian

nu kaalaman ku Rosul; -tingawitan babarna, isro mi’rajna, hijarhna, tug dugi ka lalakon perjoanganana

di medan-medan perang –

ieu oge mindeng ku urang kadangu

Nanging peristiwa pupusna Rosul

alum nguyungna para sahabat jeung langit Madinah harita,

sok luput tina implengan urang

Suasana ieu pisan, suasana nalika Rosul pupus,

anu diasongkeun ku ieu carita

Pikiran jeung rarasaan urang

bakal dibawa ka hiji mangsa, ka hiji tempat,

nu kahalang ku anggang waktu rebuan tain

Implengan urang bakal anjog ka dinya, ka hiji tempat

-       bumi Rosullulloh

Urang asa ningal layon Rosul nu ngalungsar

alumna para sohabat, juuhna cimata, sareng Bilal nu nyuuh

kalebuh dina kasedih jeung kapeurih batinna ……. !

Adegan Bubuka

 (Tahlil jeung Sholawat)

Musik ilustrasi: (Nuansa padang pasir)

Gerak: (Nyuuh)

Rampak 1 Lailaha illalah, laillaha illalah Laillaha illalah, muhammadarasulullah Rampak 2 Ya Rosulullah, salamun a’laik Ya Nabi salam, ya Nabi salamun a’alaik

Anggana (Bilal) Allahumma sholli a’la muhammadin ‘abdika Wannabiyika, warosullikannabiyil ummiyi Wa’ala alihi wa shohbihi wassallam

Narator:

Raga nu ngalungsar jero istirah panjang, teu lesot tina teuteupna. Ditetuteup terus diteuteup, meh teu ngiceup-ngiceup. Beuki rumeuk. Les ngaleungit (gerak sirah ngulahek), layon ujug-ujug musna. Manehna ngaranjug, Gentak ngagisik panon. Breh deui tembong, banusan angger ngalungsar, bangun ayem dina tengtrem. Ilang teh horng kasaput cipanon ngembeng. Teu karasa.

Kuniang manehna cengkat. Cong solat janasah. Du’a solawat ngagalindeng halon ti batin nu ngarakacak.

Rampak (Tahlil dibarung solawat)

Rampak 1 Lailaha illalah, laillaha illalah Laillaha illalah, muhammadarasulullah Rampak 2 Ya Rosulullah, salamun a’laik Ya Nabi salam, ya Nabi salamun a’alaik

Narator

Basa layon dikurebkeun, meh bae manehna bedah ngagoak. Bari tipepereket nahan rewu rupa rasa nu ngagolak, ceg leungeuna kana singkup gerak: leungeun katuhu diangkat, tuluy muter). Sewur,  sewur, laun, taneuh keusik ngarimbunan salira jisim mulia, disiram keclak cimata. Basa sore geus reup-reupan, dina peuting nu mimiti ngangkrang.

Ngabigbrig manehna balik, henteu purun cacarita jeung sasaha. Blus ka kamar, ngabebengkang. Salila-lila ngeueung nyorangan, nataran katineung ka nu mulang ninggalkeun.

“Memang anjeun kagungan Allah, ya Rosul”, ahirna Bilal ngagerendeng bari malik terus nangkuban. Tapi pameunteuna Rosul angger ngalangkang. Teu kalis ku dipeungpeunan, dipeureum-peureum. Rahuh weh manehna ngarahuh, jero jeung panjang. Dadana karasa beurat. Beurat batu na dadana nu ditindihkeun ku Umayah ngan tiba ngaraheutan kulitna. Tapi tilarna Rosul nyasaak hatena, ngagerihan batinna, mupul lelembutannana.

Panangan Rosul nu ranggem kaheman, tos ngangkat jeung nungtun manehna ti jungkrang nu peteng medem. Risalahna geus nyangking dirina, tina abid nu hina nista jadi insan nu boga ajen jeung harga diri. Ku Rosul rumasa dijelemakeun.

“Gancang panggihan Bilal, ajarkeun kalimah-kalimah adan eta (Gerak: Leungeun katuhu nungkup ceuli/peta nu adan, tuluy muterkeun awak nguriling). Manehna nu kudu nyoarakeunana, sabab sorana leuwih tarik jeung halimpu ti batan sora anjeun, “ngagalindeng deui dawuh Rosul ka Abdullah bin Zaid. Bilal meunang kahormatan, kaselir jadi muazin Rosul. Manehna deuih nu meunang kapercayaan nyekel al-khumus, saperlima bagian Rosul, yatim, miskin jeung ibnu sabil, tina harta rampasan perang. Bilal kaselir jadi bendahara Rosul.

Musik ilustrasi: (Intro/pamangkat lagu pupujian)

Rampak Taya kareueus nu pangendahna Iwal ti dipuji ku insan pinuji Taya kabagja nu panggedena Lian ti dipercaya ku Al Amin

Narator

Kacinta Rosul ka dirina, karasa ku manehna tur kasaksen ku sarerea. Ngungkulan cinta indung bapa ka anak nunggalna.

Bilal angger nyuuh. Awakna endag ku engapan hegak dadana. Cintana ka Rosul ngaleuwihan cinta ka dirina pribadi. Geus lebur jiwa ragana kana risalah nu dicandakna. Top raga top nyawa.

Cinta ka Rosul mo beunang disisilihan. Angot basa ahir-ahir kanyahoan, yen Rosul pisan sayaktosna nu nganjurkeun ka Abu Bakar supaya nebus manehna. Turta Rosul keukeuh teu kenging diwagel ku Abu Bakar, palay ngiring andil urunan artosna pikeun nebus manehna ti Umayah bin Kholaf.

Asa ngalangkang deui dina ciciptana kadoliman Umayah bin Kholaf. Breh kacipta gangasna leungeun Umayah nu nandasa dirina di sagara keusik….

Gerak: (formasi sababaraha gerakan, rongkah, adegan Bilal disiksa)

Dina ruhayna pirunan langit gurun

jeung ngempurna seuneu mata Umayyah

Dina hiukna panas sagara keusik

jeung burinyayna pecut nu nyiksikan kulit

                  Bilal bin Rabah

                  teu ngeserkeun iman najan satungtung buuk

Dina mentrangna tujuh srangenge padang ruhak

jeung gangasna amarah jahiliyah

Dina juuhna getih nu ngagarajag

jeung jelegerna siksaan kana tulang-tulangna

                  Bilal bin Rabah

                  hibar dina mubyarna cahya Muhammad

Dina beuratna gundukan batu nu ngaheumpik dadana

jeung gumurhna kabiadaban kaom Qures

Dina garingna tikoro nu ngorolok

jeung utasan nyawa nu ngan kari sasimprengeun

                  Bilal bin Rabah

                  Ngarenghap na asma Allah

                 

Ahad!  Ahad!  Ahad ……………… !

(dibarung ku rampak) : Ahad!  Ahad!  Ahad …………… !

Sanggeus nyaho kana eta lalakon nu kacida dirusiahkeunana, cintana ka Nabi beuki meulit. Binarung rasa hormat wedi asih nu clik putih. Beuki meulit taya niat pukah deui, hamo kuat pisah deui.

Asa rajet hatena kasiksa kangen, basa kapaksa kudu pisah. Hijrah ti heula ka Madinah.

Bilal: (Ngahariring lagu pupujian)

Nyeri beuheung sosonggeteun, sosonggeteun

apeuting asa sataun, sataun

ngantos Rosul teu jol bae, ngantos Rosul teu jol bae..

Narator:

Unggal poe manehna lunta ka luar kota Madinah. Ngajjentul ngarep-ngarep Nabi sumping. Pisah ukur mimingguan, bubulanan geus sakitu ripuhna. Asa tutug jajantungna kaduruk gandrung. Ari heg ayeuna kudu pisah keur salalawasna1 Ya Nabi! Ya Robi! Ya maulana!

Musik ilustrasi : (Biola ngagelik, rada lila, ngahudang suasana sedih)

Narator

Peuting terus ngarayap ngarungkup Madinah nu nguhkul alum. Kota cahaya leungiteun cahya. Bentang tingkerejep, kiceup panon nahan cimata. Langit ngajumbleng hieum, tan warna tan soara. Ngan angin teu eureun-eureun ngahiur, ngadius bangun nu rusuh, mawa beja ka lurung-lurung jagat buana…. Al Amin parantos mulih! Rosulullah tos ngantunkeun.

Gerak (Ti arah nu beda, duaan asup ka panggung, rusuh, nepikeun beja yen Rosul geus pupus. Ditutukeun ku nu sejen, pahibut, teu percaya, silih tanya, patinggorowok)

Guneman Rosul parantos pupus? Rosul tos ngantunkeun? Rosul parantos pupus? Rosul parantos pupuuuuuuus…! Al Amin tos ngantunkeueueueueun…! Rosul parantos pupuuuuuus…! Al Amin tos ngantunkeueueueun…!

Narator

Kulisik Bilal ngulisik. Nyangigir, gulinggasahan. Blak deui ngabebengkang. Leungeunna nyampay dina tarang. Panon nu beueus ceuleuyeu, melong kosong tan paninggal

Bilal: (bari nguniang cengkat, pepeta)

“Anjeun teh bulan purnama, nu nyaangan mongklengna kahirupan manusa. Kumaha horeng jadina, sabada nur anjeun nyalira pareum. Geus surup bulan purnama! Geus surup bulan purnama! Langit medem bumi peteng! Tapi henteu! Henteu! Astagfirullah!”.

“Rosul baris terus jumeneng sapanjang mangsa. Salalawasna. Lalakon hayatna nu arum kebek wawangi jeung meuhpeuy ku kahadean, tapak lacakna nu gumebyar ku ahlak jeung bebeneran, ngajadi obor hidayah nu nyinaran umat enggoning lumampah ngigelan jaman.”

“Teu, Rosul teu pupus jeung moal pupus-pupus. Sapanjang Qur’an al-karim masih aya jeung masih tetep jadi bacaan umat. Sapanjang sunahnna nu endah mulya, tetep jadi teteken jeung tetekon hirup manusa. Satungtung langit mayung, jagat ngampar, srangenge nyorot manceran…….”

Rampak Tahriman Allahummarhamna bil qur’an Waj’alhulana imama wanuron wahuda warohmah…jst

Narator:

Balebat nyingraykeun lalangse peuting lalaunan. Pajar ngarongheap datang. Tebeh wetan mimiti ray-rayan. Tingarudat sutra emas, tingarudat nyulam geblegan buludri hideung.

Ras kana kawajiban nu geus baku. Bilal nguniang hudang. Kulutrak mukakeun panto. Ngadaligdeug lengkahna ngajugjug masjid.

Geus baku, memeh adan teh ngadu’a heula. Sangkan dipaparin rijki hidayah jeung takwa, kabersihan jeung kajembaran jiwa. Jeung jaga dihijikeun dina kumpulan para sodikin, syuhada jeung para solihin.

Basa waktu adan geus manjing, sorana ngalanglaung ti munara masjid Nabawi. Husu tur agung. Panggero langit ngumbul, mumbul ka awang-uwung. Sumeleket mapay birit-birit peuting. Nambah simpe tungtung peuting nu meujeuhna jempling.

Musik ilustrasi:

Bilal: (Nguniang nangtung, adan)

Allahu Akbar, Allahu Akbar

Allahu Akbar, Allahu Akbar

Asyhadu an laailaha illallah

Asyhadu an laailaha illallah

Asyhadu anna …….

(Bilal teu kebat adan, kaburu ngarumpuyuk, nyuuh)

Narator:

Teu bisa kebat…….

Tikorona ujug-ujug nyelek. Dadana ngadadak eungap. Biwirna rapet, letahna beurat. Pireu, ngadadak pireu, lir dicekek eureup-eureup. Berebey cipanon haneut mapay pipina. Lila-lila ngagarajag. Gentak ditungkup ku dua dampal leungeunna. Tapi rembes ngaliwatan sela-sela ramona. Sawatara jongjongan manehna ngagukguk. Sumegruk bari nyuuh kana tembok.

Satekah polah manehna negerkeun hatena. Ngetrukkeun saayana jajaten dirina. Ahirna bisa deui nuluykeun hanca adanna. Tapi socana ngayapak jeung dumareuda….

Bilal Maksakeun maneh rumanggieung cengkat deui Asyhadu anna Muhammadar Rosulullah. Asyhadu anna Muhammadar Rosulullah. Hayya alas sholah. Hayya alas sholah, Hayya alal falah. Hayya alal falah Asholatu khoirum minannaum Asholatu khoirum minannaum Allahu Akbar, Allahu Akbar La ilaha ilallah………………. Rampak Bari namprakeun leungeun, ngadua sabada adan Allahumma robba hadzihi da’wati tammah Wassholati qoimah… jst

Narator

Rengse solat, gura-giru manehna balik. Blus deui numpi diri.

“Tilarna anjeun ya Rosulullah, mangrupi hiji karugelan. Namung tos kitu qodo Allah lumaku. Moal aya hiji kakuatan nu wasa nolak, nyulumput”.

Waktu lohor ampir cunduk. Bilal karek turun ti imahna. Datang ka masjid, gek diuk di juru misah jeung mencilkeun maneh ti batur

Geus waktuna adan. Tapi sora Bilal angger lebeng. Breh di juru. Bilal nguhkul jero tapakur

Sahabat Adan, ya Bilal Bilal Kuring moal adan-adan deui. Pek we nu sejen

Narator:

Tembalna ngageuri. Luk deui tungkul. Torojol Abu Bakar sumping.

Musik: (panganteb suasana kasumpingan Abu Bakar)

Abu Bakar Ka mana Bilal? Di mana Bilal? Bila lIeu kaula, ya Abu Bakar Abu Bakar Adan, ya Bilal! Bilal Moal! Abu Bakar Naha? Bilal Upamana anjeun baheula ngamerdekakeun kaula teh, sangkan kaula tetep jeung anjeun, memang aya hak anjeun, ya Abu Bakar. Tapi, lamun anjeun ngamerdekakeun kaula teh ngan wungkul karana Allah, antep kaula dina kamerdekaan kaula ieu Demi karana Allah, kaula ngamerdekakeun anjeun Lamun kitu, kuring moal adan pikeun sing saha bae, salian ti Rosulullah (tembal Bilal anteb dareuda bari tuluy nyuuh deui)

Musik ilustrasi (sedih…)

Narator:

Bawirasa ngan ku jalan eta manehna bisa nembongkeun bela bakti jeung kasatiaan ka Rosulullah. Pangupukan lelembutanana, huluwotan jeung muara cintana

Madinah beuki ngungun. Leungiteun cahaya, leungiteun soara. Aya hariring angin lalaunan, ngagalindeng ngawihkeun kidung surgawi…..

Musik ilustrasi (pamangkat kana lagu pupujian)

Rampak Wilujeng mangsa lahirna Wilujeng mangsa tilarna Wilujeng wanci baasna deui Wilujeng wanci baasna deui

Hurmat urang ka Anjeunna Dina mangsa jumenengna Sareng sabada wafatna Eta teu aya bedana Duh Gusti jungjunan abdi Sidna Muhammad habibi Pamugi salira nampi Ka nu hina diri abdi Abdi umat ahir jaman Anu banget panasaran Hoyong tepang ngadeuheusan Seja tumut erah badan Di yaumil ahir jaga Mugi ngocor safa’atna Abdi sareng indung bapa Ngiring Gusti ka sawarga Di yaumal ahir jaga Mugi ngocor safa’atna Abdi sareng indung bapa Ngiring Gusti ka sawarga

RENGSE

Katerangan

Ieu naskah direka tina carita pondok karya Yous Hamdan anu dimuat dina buku Sawidak Carita Pondok, PT Mangle Panglipur, 1983. pikeun kaperluan pagelaran dramatisasi, eta carpon diraeh deui. Taun 1998 jeung 2002, ieu naskah kungsi dipagelarkeun sababaraha kali ku Teater 7 Damar Bandung di sababaraha kota (Bandung, Garut jeung Tasikmalaya)

Sumber Panggelar  Sastra

Drs Ahmad Hadi

SISINDIRAN AGUSTUSAN

(pamaen asup ka Pentas, ngawih Rampak sekar lagu Sisindiran)

Sisindiran sisindiran, sindir sampir gogonjokan

Sisindiran sisindiran,  ……………………………

ngaramekeun agustusan

warisan karuhun urang

omat ulah kasindiran

ngageuing diri sorangan

(Memeh sisindiran tiasa dilebetan ku paguneman heula, tuluy nepikeun sisindiran sewang-sewangan luyu jeung jejer pasualan nu rek ditepikeung)

(Jejer: Kamerdekaan & Pangwangunan)

Ka cikarang meuli uyah

Meuli suling direkaan

Hayu urang suka bungah

Mieling kamerdekaan

Baheula ka Karangtengah

Kiwari ka Leuwipanjang

Baheula urang dijajah

Kiwari ngan kari senang

Sangu liwet saboboko

Dibawa ka parapatan

Masing inget ulah poho

Ka jasa para pahlawan

Ngisikan dina pancuran

Moe baju na gantungan

Ngeusian kamerdekaan

Ngamajukeun pangwangunan

Mun urang ka Sukamaju

Meuli lobak jeung tarasi

Mun hayang nagara maju

Ulah loba nu korupsi

Ka Cibingbin ngala haur

Mawa loyang ka ondangan

Pamingpin nu dilaluhur

Ngan hayang ngeunah sorangan

(Jejer: Pendidikan)

Ngala hurang wanci lohor

Ngala saga pikeun ubar

Lembur urang tangtu sohor

Lamun wargana motekar

Meuli hurang ka Pananjung

Meuli minyak dina botol

Lembur urang bakal nanjung

Lamun rahayatna getol

Mun liar ka alun-alun

Rek diuk na bangku kai

Mun diajar taun-taun

Tinangtu boga pangarti

Mun hayang ka Kebonkopi

Ulah poho mawa apel

Mun urang boga pangarti

Ku batur tangtu diandel

 
Mang Ajid rek ngala buah

Ngala nangka ka Cidora

Di masjid malem Jumaah

Nu aya ngan budak ngora

Pameuntasan mindeng kosong

Sabab cukangna paralid

Pangaosan mindeng kosong

Sabab sepuhna marelid

(Jejer: Siskamling)

Meuli sate ka Cilamping

Balikna rek tumpak delman

Pa Erte nitah siskamling

Supaya lingkungan aman

Meuli rante reujeung parang

Meuli sugu eukeur nyerut

Pa Erte pamingpin urang

Kudu digugu ditiru

Majar maneh tumpak Honda

Singhoreng tumpak keretek

Majar maneh rek ngaronda

Singhoreng rek ngadon kerek

Baju pungsat ka tungtungna

Baju renda enggeus enggeus soek

Bangsat genah lalugina

Lantaran nu ronda kerek

Majar maneh tumpak Honda

Singhoreng mah tumpak kuda

Majar maneh rek ngaronda

Singhoreng ka imah randa

Ka Cijulang tumpak kuda

Tangtu ginding make topi

Lamun melang ka nu ngaronda

Sing sering ngirim cikopi

(Jejer: Lingkungan Alam)

Boboko sokona panjang

Paranti nunda aseupan

Halodo teuing ku panjang

Patani engap-engapan

Aya kueh dina piring

Rek didahar lamun hayang

Cabe paeh tomat garing

Kumaha nya mayar hutang

Lamun urang hayang jajan

Kade poho mawa piring

Lamun hayang aya hujan

Kudu ngamandian ucing

Saeran dina kihujan

Hayam bikang dina kisa

Pangeran teu mere hujan

Sabab urang loba dosa

(Jejer: Pamuda/Rumaja)

Tumpak kuda ka Cipari

Tumpak kahar sugan bisa

Pamuda jaman kiwari

Motekar loba kabisa

Mawa pita dibungkusan

Mawa kai dikunjalan

Hayang pesta Agustusan

Dagang cai tengah jalan

 
Mawa pita dibungkusan

Mawa kaen lalambaran

Hayang pesta agustusan

Baramaen tengah jalan

Ka Cigending meuli siwur

Meuli sarung anu rubak

Haying ginding cara batur

Buuk rancung kawas landak

Ngala kuya ka Cihaur

Meuli kangkung dina misting

Haying gaya cara batur

Ceuli jeung irung dianting

Tumpak kuda ka Cikarang

Jalanna sok robah-robah

Pamuda di lembur urang

Teu kabita ku Narkoba

(Pamaen kaluar ti pentas, ngigel bari rampak ngawihkeun lagu Sisindiran)

Sisindiran sisindiran, sindir sampir gogonjokan

Sisindiran sisindiran,  ……………………………

ngaramekeun agustusan

warisan karuhun urang

omat ulah kasindiran

ngageuing diri sorangan

TAMAT

BIANTARA PATURAY TINEUNG

Biantara Wawakil Siswa

Assalamu’alaikum wr. wb.

Puji sinareng sukur kasanggakeun ka Allah Illahi Robbi. Alhamdulillah wasyukurilah, Laillahhailallah, Subhanallah dina danget ieu urang  sadaya tiasa riung mungpulung dina raraga nyakseni upacara Paturay Tineung, wireh sim kuring saparakanca bade ngantunkeun ieu sakola sabada tamat diajar salami tilu taun.

Bapa kalih Ibu, hadirin hormateun sim kuring

Mungguh ari waktu asa nyeak pisan sajorelat. Asa kamari keneh sim kuring saparakanca munggaran lebet ka ieu sakola, ayeuna tos kedah paturay deui. Sim kuring saparakanca kedah miang deui neraskeun sakola, ngahontal harepan sareng cita-cita.

Kantenan wae salami tilu taun diajar di ieu sakola, seueur pisan anu bakal janten panineungan. Di dieu, di sakola urang nu genah pikabetaheun, sim kuring saparakanca diajar neangan elmu. Ruang riung boh di kelas boh dina rupa-rupa kagiatan bari sakapeung sempal guyon gogonjakan sareng rerencangan. Tangtos bae eta sadayana bakal janten panineungan nu moal kahihilapkeun. Atuh kasaean Bapa kalih Ibu Guru sadaya, elmu pangaweruhna anu didugikeun ka sim kuring saparakanca tangtos bakal nyerep dina angen, janten obor nu nyaangan jalan sorangeun. Pamugi elmu nu katampi sing janten mangpaat kanggo abdi saparakanca.

Saterasna pirang-pirang kasaean Bapa kalih Ibu, sim kuring saparakanca teu tiasa males eta kasaean, mung tiasa ngedalkeun du’a, pamugi rupining elmu sareng katiasa anu parantos dipaparinkeun, kenging ganjaran anu mangtikel-tikel ti Allah Ala Wa Zalla. Amin

Bapa kalih Ibu guru kalebet rengrengan ti tata usaha, salami sim kuring saparakanca diajar di ieu sakola tangtosna seueur pisan kalepatan, seueur pisan sikep sareng paripolah anu tangtosna tiasa janten ngajaheutkeun manah ka sadayana. Jalaran kitu, ngawakilan rerencangan sadayana, dina danget ieu sim kuring neda sih hapuntenna, mugi jembar hapuntenna kana samudaya kalelepatan sareng kaluluputan.

Pamungkas, neda pidua ti sadayana, pamugi sim kuring saparakanca nu lulus taun ieu sing tiasa neraskeun tolabul elmu. Lungsur-langsar teu aya halangan-harungan, nyukcruk elmu di tingkat nu langkung luhur

Rupina sakitu nu kapihatur. Bilih aya basa nu kirang merenah, kecap nu kirang larap, bilih aya kalimah nu teu raos kana manah, neda hapuntenna

Wabillahi taufik wal hidayah. Wassalu’alaikum  wr. wb.

BIANTARA PATURAY TINEUNG

Biantara Wawakil Siswa

Assalamu’alaikum wr. wb.

Puji sinareng sukur kasanggakeun ka Allah Illahi Robbi. Alhamdulillah wasyukurilah, Laillahhailallah, Subhanallah dina danget ieu urang  sadaya tiasa riung mungpulung dina raraga nyakseni upacara Paturay Tineung, wireh sim kuring saparakanca bade ngantunkeun ieu sakola sabada tamat diajar salami tilu taun.

Bapa kalih Ibu, hadirin hormateun sim kuring

Mungguh ari waktu asa nyeak pisan sajorelat. Asa kamari keneh sim kuring saparakanca munggaran lebet ka ieu sakola, ayeuna tos kedah paturay deui. Sim kuring saparakanca kedah miang deui neraskeun sakola, ngahontal harepan sareng cita-cita.

Kantenan wae salami tilu taun diajar di ieu sakola, seueur pisan anu bakal janten panineungan. Di dieu, di sakola urang nu genah pikabetaheun, sim kuring saparakanca diajar neangan elmu. Ruang riung boh di kelas boh dina rupa-rupa kagiatan bari sakapeung sempal guyon gogonjakan sareng rerencangan. Tangtos bae eta sadayana bakal janten panineungan nu moal kahihilapkeun. Atuh kasaean Bapa kalih Ibu Guru sadaya, elmu pangaweruhna anu didugikeun ka sim kuring saparakanca tangtos bakal nyerep dina angen, janten obor nu nyaangan jalan sorangeun. Pamugi elmu nu katampi sing janten mangpaat kanggo abdi saparakanca.

Saterasna pirang-pirang kasaean Bapa kalih Ibu, sim kuring saparakanca teu tiasa males eta kasaean, mung tiasa ngedalkeun du’a, pamugi rupining elmu sareng katiasa anu parantos dipaparinkeun, kenging ganjaran anu mangtikel-tikel ti Allah Ala Wa Zalla. Amin

Bapa kalih Ibu guru kalebet rengrengan ti tata usaha, salami sim kuring saparakanca diajar di ieu sakola tangtosna seueur pisan kalepatan, seueur pisan sikep sareng paripolah anu tangtosna tiasa janten ngajaheutkeun manah ka sadayana. Jalaran kitu, ngawakilan rerencangan sadayana, dina danget ieu sim kuring neda sih hapuntenna, mugi jembar hapuntenna kana samudaya kalelepatan sareng kaluluputan.

Pamungkas, neda pidua ti sadayana, pamugi sim kuring saparakanca nu lulus taun ieu sing tiasa neraskeun tolabul elmu. Lungsur-langsar teu aya halangan-harungan, nyukcruk elmu di tingkat nu langkung luhur

Rupina sakitu nu kapihatur. Bilih aya basa nu kirang merenah, kecap nu kirang larap, bilih aya kalimah nu teu raos kana manah, neda hapuntenna

Wabillahi taufik wal hidayah. Wassalu’alaikum  wr. wb.

PATURAY TINEUNG

Overture (Gending Bubuka)

Nu mawa umubul-umbul asup ka pentas, molahkeun umbul-umbul tuluy sideku. Umbul-umbul didoyongkeun siga ka wangun gapura/lawang saketeng.

Barisan Maktal (penari pameget bubuka dina wayang) asup ka pentas bari mawa gugunungan, jumlahna diluyukeun jeung kabutuhan tulisan anu rek dipake, contona PILEULEUYAN…..(jumlahna 11 gugunungan), diturukeun kuna mawa bandera, panji atawa pataka. Ngawangun pormasi. Gerakan diluyukeun jeung Rajah.

Rajah Pun sapun ka Maha Agung, Ka Allah Illahi Robbi Ya Allah pamuntangan beurang, Ya Robbi pamantengan peuting Sajatining pati hurip, Sajatining kalanggengan Sumeja neda paralun, paralun kabudeur awun Ka rumuhun ka karuhun Seja amit kami mipit Seja menta kami ngala Ngunder tineung panasaran, Mapay beja mangsa lawas Tapak lacak na wiyata Di lemah sarakan………..*) (dieusi ku ngaran tempat, lembur, wewengkon) Ngajungjung lungguhna elmu, komarana atikan Ti mendi pipasinieun, ti mana picaritaeun Urang nyoreang ka tukang, urang jujut hiji-hiji Ngarah puguh nya pitutur, ti bihari ka kiwari Agung…agung………

Gending/Narasi marengan asupna rombongan pager ayu, sapasang wawakil siswa pinunjul kahiji dipayungan ku juru payung, nu ngagotong jampana/kurung manuk dieusi sapasang manuk japati, disatukangeunana dalapan  pasang siswa pinunjul, dituturkeun ku penari maktal anu mawa gugunungan.

Narator Geura lagukeun kidung liwung nu panungtung Geura hariringkeun kawih asih tina ati Sugan teteg ieu lengkah nu rek lunta Sugan jembar ieu lengkah rek paturay

Mun isuk balebat nyingray di wetan Srangenge sumirat deui di langit …………………..*) Boa saukur jadi kalangkang Kalangkang dina eunteung panineungan urang Mungguh ari waktu Kapan jamparing anu melesat Nyeak ninggalkeun patk demi patok lalakon Raca tapakna jadi pilar-pilar kakelar Tilu taun geuning geus kalaring, sempal guyon gogonjakan Silih asih ku pangarti Silih asuh ku kaweruh Ayeuna nincak mangsana urang paturay pajauh Pasini urang tepi ka dieu Lalakon urang tepi ka poe ieu Tali batin urang cangreud dina ati Baris nganteng jadi gurat panineungan Di dieu aya bagja jeung cimata Di dieu aya nu jajap jeung nu dijajapkeun Awor dina ringkang pileuleuyan Nu dikantun wuwuh ngungun Nanging bagja binarung bagja Ngungun soteh reh waktosna kedah pisah Nanging bagja sabab sirung baris renung Baris mangkak jadi wawangi lemah cai

Gending simpe

Kapala sakola dihaturanan ka panggung. Sapasang wawakil siswa pinunjul sungkem, nu sejenna milu diuk tarungkul disatukangeunana.

Gending ngeusian narasi

Narator  Bral, geura tandang neang kahayang Nyukcruk elmu nyungsi harti Muga jembar ku panalar Mugi sugih ku pangarti Bral, geura leumpang anaking Sing jucung ngudag kahayang Hidep dijajap du’a jeung cimata Dijajap du’a jeung cimata

Bral geura miang anaking Hidep dijurung lumaku Lumampah nyorang lalakon Nyaba ka jaganing jaga Neang hirup nu rahayu

Sabada acara sungkem, kapala sakola masrahkeun ijazah ka wawakil siswa, sasalaman ngawilujengkeun, tuluy ngalepaskeun japati sajodo tina jampana/kurung, minangka simbul paturay jeung pangjurung ka parasiswa. Barisan gugunungan malik-malikeun gugunungan masing-masing, luyu jeung gending, tepi ka kabaca aksara: PILEULEUYAN…..Prosesi rengse pamaen ka luar pentas.